Boere hoor ‘dis jou beurt’

Posted in Latest News

AGRI-PULSE – Die tema van die Agri NW Jongboerkongres is “Dis jou beurt”.

Die frase is deurentyd aangehaal tydens die kongres op 29 April by Senwes in Klerksdorp.
Waarom juis “ Dis jou beurt”? Die landbou is besig om die gevolge van covid af te skud en boere moet nou alle geleenthede aangryp, want dis hul beurt. Willem De Chavonnes Vrugt, president: Agri NW, het gesê boere moet mekaar nou meer as ooit ondersteun, omdat die NW-klimaat nie altyd goed vir landbou is nie en die regering boere gefaal het.
‘Die uittredende voorsitter van die NW-Jongboerkomitee, Louis Wessels, het boere as besonderse mense beskryf, “mense wat glo in wat hulle nie sien nie. Dis geloof”.
Hy het bygevoeg jongboere kan ‘n verskil maak in die veranderende tye.
Corné Kruger, finansiële bestuurder: Senwes, wat namens die groep se hoof- uitvoerende beampte Francois Strydom gepraat het, het gesê die wêreld het verander met Covid en nou die oorlog in Europa.
“Europa het negatiewe groei en SA het steeds positiewe groei. Landbou en mynbou dryf SA groei en ten spyte van verskeie negatiewe gebeure groei SA steeds.
Prof Ferdi Meyer, direkteur: BFAP, het gepraat oor die impak van politieke onstabiliteit in landbou. (Meer oor sy praatjie in ‘n ander berig).
Chris Koch, bestuurder: risiko en strategie: Senwes, het die boere toegespreek oor scenario beplanning met duidelike boodskappe: bly een stap voor jou mededinger, doen navorsing, beplan vir uiterstes en moenie dink die toekoms is soos die verlede nie.
“Bekamp te veel selfvertroue en moedig oop debat aan,” is ook belangrik vir scenario beplanning.
Die borge is bekendgestel met onder meer NWK, Nedbank en ATKV Buffelspoort wat die jongboere steun.
Die ATKV het die boere laat dans op internasionale dansdag!