Sala en Rebecca se “Morogo Seshabo” – ‘n tradisionele wenresep

Written by Amore vd Westhuizen. Posted in Recipe

Daar is onlangs aan hierdie korrespondent gesê dat in Suid-Afrika, en veral hier in die Noordwes, eet ons nie pap en vleis nie – ons eet “pap en marog”. Vir sommige van ons wek die woord “marog” (of “Morogo” soos dit eintlik gespel word) herinneringe van jonk wees en die plaaslewe.
Steeds is daar van ons wat in die stad woon en nie van hierdie wonderlike dis weet nie. Vir ons is dit maar die ou gewone tamatie-en-uie-sousie. Maar glo my, “Morogo” wat voorberei is soos wat Sala en Rebecca van die Agri Pulse dit doen sal jou asem wegslaan. Hierdie eenvoudige (maar ook unieke) resep is ‘n wenner, maak nie saak wanneer jy dit maak nie – of dit nou ‘n Sondagmiddagete saam met die familie is of selfs ‘n bietjie omkoopkos vir wanneer jy en die meisie se pa “lobola” onderhandel.
Ja, om Suid-Afrikaans te wees! Om die tradisionele met die moderne te meng – dít is wat hierdie land so besonders maak!
Na aanleiding van verlede week se pap-resepte maak Sala en Rebecca hierdie week vir ons die eerste van ‘n reeks ‘seshabo’ - disse wat al te lekker saam met pap gaan. Onthou dat dit heel moontlik is om die ‘Morogo’ met spinasie te vervang – maar komaan, wees bietjie eg-Suid-Afrikaans en maak vir jou ‘n lekker Morogo Seshabo. 

Morogo of spinasie “Seshabo”

Bestanddele
1 kg mins
3 groot aartappels, in blokkies gesny
1 groot ui, in blokkies gesny
1/2 groensoetrissie
Ongeveer 3 kg Morogo-blare (of 4 groot bosse spinasie-blare)
1 teelepel sout
1 teelepel witpeper

Metode
Die Morogo-blare (of spinasie-blare) word eerste in ‘n pot gaargemaak totdat dit sag is. Gooi volgende die ui en aartappels by en kook vir 5 minute terwyl jy die mengsel roer. Roer die sout en witpeper by vir geur. Die mins kom laaste by en word dan binne die blaremengsel gaar gemaak vir ongeveer 10 minute. Sit dan voor saam met ‘n lekker stukkie pap en vleis.