AGRIPULSE – LANSERIA – Sakata Saad is tans een van die grootste saadgroepe ter wêreld met uitgebreide wêreldwye navorsingsprogramme in groente- en blomsaad.
Sakata het homself as ‘n betroubare verskaffer van kwaliteit saad gevestig, deur ‘n fokus op produkontwikkeling en tegniese ondersteuningsuitnemendheid in die veld. Deur gespesialiseerde produkbestuur verseker Sakata dat hulle voortdurend die beste produkkwaliteit, konsekwentheid, diversiteit en voedingswaarde aan die verbruiker kan voorsien.
AgriPulse was bevoorreg om een van Sakata Saad SA se Boeredag-geleenthede op 13 Februarie by die hoofkantoor in Lanseria, Gauteng, by te woon.
Die geleentheid het ‘n indrukwekkende opkoms van sowat 700 besoekers oor die vier dae gelok. Die Boeredag, wat elke tweede jaar aangebied word, dien as ‘n noodsaaklike platform vir Sakata Saad SA om kontak te maak met besoekers wat wissel van kommersiële tot kleinskaalse boere, saailingekwekers, verwerkers, kleinhandelaars, sowel as besoekers van die Suider-Afrikaanse Ontwikkelingsgemeenskap (SAOG).
Die kern van die geleentheid was die tentoonstelling van Sakata se bekende en betroubare variëteite saam met opwindende en nuwe ontwikkelings. Met ‘n fokus op die bekendstelling van nuwe variëteite en die opvoeding van besoekers oor die uitgebreide produkreeks, is besoekers op ‘n toer deur Sakata se proefvelde geneem met produkspesialiste wat waardevolle insigte oor huidige en nuwe variëteite verskaf het.
Van die hoogtepunte tydens die geleentheid was die bekendstelling van verskeie nuwe generasie variëteite, insluitend Chaak*, Suider-Afrika se eerste F1-baster Habanero; die soetrissie Powerslam* en Accord*; F1-basterkool Mieluna*, ‘n nuwe F1-basterbotterskorsie en Nairobi*, die jongste toevoeging tot Sakata se F1-basterblomkoolreeks.
* Hibriede/Basters is die kruising van twee verskillende spesies of variëteite. Hibriede plante het groter genetiese diversiteit as hul ouers.
Die 2024-Boeredag was Sakata Saad SA se mees suksesvolle en betekenisvolle geleentheid nog. Sakata bly toegewyd aan die lewering van kwaliteit, betroubaarheid en diens aan kliënte en geleenthede soos hierdie druk werklik hul leuse van passie in saad uit.
Vir meer inligting oor Sakata Saad Suider-Afrika en sy innoverende saadoplossings, besoek asseblief www.sakata.co.za
